Վանաձորում ճանապարհների գծանշումները լուրջ խնդիրներ են առաջացրել Հայաստանի խոշորագույն ձեռնարկություններից մեկի՝ 4 հազար աշխատատեղ ունեցող «Գլորիա» կարի ֆաբրիկայի համար: Եկել ու հենց ֆաբրիկայի դարպասների առաջ կետագծերի փոխարեն շրջադարձն արգելող կրկնակի հոծ գիծ են գծել: Ֆաբրիկայի սեփականատեր Բագրատ Դարբինյանն ասում է՝ օրական 5-6 մինչև 15 մետր երկարությամբ բեռնատար է ելումուտ անում, Երևանյան խճուղին շատ նեղ է ֆաբրիկա մուտք գործելու համար: Պնդում է, թե հոծ գծերն արտադրությունը կկանգնեցնեն:
«Ես դեռ ոչինչ, հիմնարկի ղեկավար, գնացի վերևը պտտվեցի, եկա, մտա՝ 5կմ վերևից: Բայց բեռնատարը, եթե նույնիսկ գնա ուրիշ տեղ շրջադարձ անի, չի կարող մտնել, որովհետև շատ երկար է, էդ անկյունը չի կարող մտնել, դա անհնար է: Եթե դա փակվի, մեր գործարանը չի կարող աշխատել», - «Ազատության» հետ զույցում ասաց Դարբինյանը:
Գործարարն իր այս մտահոգությունը նախորդ օրերին թե՛ գծանշողներին, թե՛ իրավապահներին ու թե՛ Վանաձորի համայնքապետարան է հասցրել, բայց, ասում է, պատասխան է ստացել, որ հաստատված նախագիծ կա, փոխել չեն կարող. - «Անցած տարի կետագծեր էր, էս տարի գծողը ջղայնացել էր, ասաց՝ «հոծ գիծ եմ գծում»:
Նշագծող ընկերության ներկայացուցիչները, որ չցանկացան ներկայանալ, «Ազատությանն» էլ ասացին, որ պարտավոր են նախագծով շարժվել, դրանից շեղվել չեն կարող: Մինչդեռ «Ազատության» նկարահանումից րոպեներ անց նույն աշխատակիցը տեղեկացրեց, որ փոփոխություն է եղել, ցուցում է ստացել՝ կարի ֆաբրիկայի դարպասների դիմաց հոծ գծի փոխարեն շրջադարձի հնարավորությամբ կետագծեր անել:
Վանաձորի համայնքապետարանից հայտնեցին, որ ճանապարհային գծանշումները, հատկապես միջպետական ճանապարհների դեպքում, ճանապարհային դեպարտամենտն է կազմում, իսկ Վանաձորի ավագանին՝ հաստատում: Վերջին անգամ ավագանին 2019-ին է հաստատել քաղաքի նշագծումների սխեման: Անցած 6 տարիներին հենց ավագանու հաստատած այդ որոշման հիման վրա էլ գծանշվել են Վանաձորի փողոցները, ասում է համայնքապետի մամուլի խոսնակը: Երևանյան խճուղին, քանի որ միջպետական ճանապարհ է, բացառապես նշագծվում է դեպարտամենտի համաձայնությամբ, նշում է խոսնակը:
«Հաշվի առնելով, որ դա Վանաձորի մեծագույն, խոշորագույն արտահանողներից մեկն է՝ տեքստիլ ֆաբրիկան, թույլտվություն տրվել է, որպեսզի այդտեղ լինեն կետագծեր, և մեծ մեքենաները կարողանան օգտվել այդ հատվածից», - փոխանցեցին համայնքապետարանից:
«Գլորիա»-ի սեփականատեր Բագրատ Դարբինյանն այն գործարարն է, որ անցած տարի մեղադրվեց շինարարական ընկերության միջնորդությամբ համայնքապետարանի քաղաքաշինության բաժնի պետ Սուրեն Աբովյանին մոտ 2 միլիոն դրամի կաշառք տալու համար: Ըստ դատական գործի՝ գործարարն այդ գումարը համայնքապետարանի պաշտոնյային փոխանցել էր կարի ֆաբրիկայի նախկին տարածքում կառուցված շինությունների ավարտական ակտերն «առանց քաղաքաշինության տեսչական մարմնի եզրակացության ստանալու համար»: Մեկ ամիս առաջ Բագրատ Դարբինյանը երկու տարվա ազատազրկման է դատապարտվել: Դատարանը որոշել է ազատազրկումը պայմանականորեն չկիրառել և սահմանել փորձաշրջան՝ մեկ տարի ժամկետով: Դատարանը նաև որոշել է, որ առանց վերահսկողություն իրականացնող մարմնի համաձայնության Դարբինյանը չի կարող Հայաստանի սահմանը հատել կամ փոխել բնակության վայրը:
Խոշոր գործարարը, որ հաճախակի է միջազգային գործընկերների հետ հանդիպման անհրաժեշտություն ունենում, ասում է՝ մեծ խնդիրների առաջ է կանգնում արտադրությունը կազմակերպելիս:
Կաշառքի մեղադրանքով դատարանի առաջ կանգնած գործարարն անցած տարի «Ազատությանն» ասել էր՝ «ոչ թե կաշառք, այլ մաղարիչ» է փոխանցել քաղաքապետարանի պաշտոնյային, ստիպված է եղել գումարը ծախսել ավարտական ակտերն ստանալու համար: Այլ կերպ Վանաձորում գործարարները գործը գլուխ բերելու մեծ դժվարություններ են ունենում:
Նրանից, ըստ քննիչների, շինարարական կազմակերպության սեփականատեր Սամվել Մարգարյանի միջոցով 2 միլիոնի կաշառք ստացած Սուրեն Աբովյանը դեռ տնային կալանքի տակ է: Աբովյանի գործով դատաքննությունը չի ավարտվել: Դատական գործի համաձայն, նա ևս երկու գործարարից է կաշառք ստացել շինարարական կազմակերպության միջնորդությամբ: Միայն այս երեք դրվագով Սուրեն Աբովյանը, ըստ մեղադրանքի, ավելի քան 25 հազար դոլարի կաշառք է ստացել:
